ҲАМОИШИ ГИРАНДАГОНИ СТИПЕНДИЯИ ПРЕЗИДЕНТӢ ТАҲТИ УНВОНИ "ҶАВОНОН - ПАЙРАВИ ПЕШВОИ МИЛЛАТ" ДАР ШАҲРИ ИСТАРАВШАН

25 феврали соли 2022 бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо мақомоти иҷроияи ҳокимияти давлатии шаҳри Истаравшан ҳамоиши гирандагони Стипендияи Президенти Ҷумҳурии Тоҷикистон  таҳти унвони “Ҷавонон-пайрави Пешвои миллат” баргузор гардид, ки дар чорабинии мазкур  раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳмонзода Абдулло Қурбоналӣ,  раиси шаҳри Истаравшан Адҳам Маъмурзода номояндагони сохторҳои маҳаллии Кумита дар вилояти Суғд, ва гирандагони стипендияи Президентӣ аз шаҳру ноҳияҳои Истаравшан, Спитамен, Деваштич ва Зафаробод ширкат варзиданд. Сараввал иштирокчиёни ҳамоиш аз намоиши истеҳсоли корхонаҳои саноатии шаҳр ва маҳсули дасти ҷавонони ҳунарманд дидан намуда, ба сатҳу сифати истеҳсолот ва ҳунари онҳо баҳои баланд доданд ва иброз намуданд, ки ташкили чунин намоишҳо дар соли эълон гардидани солҳои 2022-2026 "Солҳои рушди соҳаи саноат" ва ҷиҳати ҷалби ҷавонону наврасон ба эҳёи ҳунарҳои мардумӣ мувофиқи мақсад мебошад.        Ҳамоиши гирандагони стипендияи Президентӣ бо садо додани Суруди миллии Тоҷикистон оғоз гардид. Раиси шаҳри Истаравшан Адҳам Маъмурзода зимни суханронии хеш гирандагони Стипендияи Президенти Ҷумҳурии Тоҷикистонро шодбош гуфта, аз дастгириҳои давлатии ҷавонон, хусусан дар мадди аввали сиёсати худ қарор додани сиёсати давлатии ҷавонон аз ҷониби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардид ва доир ба дастовардҳои ҷавонон ва саҳми онҳо дар пешрафти ҷомеа ибрози андеша намуд. Ҳамзамон ҷавонони даврони соҳибистиқлолии кишварро ҷиҳати ҳифзи манфиатҳои миллӣ, арҷ гузоштан ба муқаддасоти миллӣ ва ватандӯстиву хештаншиносӣ ҳидоят намуда, таъкид дошт, ки  чун пайравони асили Пешвои муаззами миллат дар рушду нумӯи кишвар бо дастовардҳои назаррас саҳмгузор бошанд.        Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳмонзода Абдулло Қурбоналӣ низ дар суханронии худ аз ташаббус ва дастгириҳои пайвастаи Пешвои муаззами миллат ёдовар гардида, зикр доштанд, ки бо иқдомҳои ҷавонпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз ҷиҳати ҳавасмандгардонии ҷавонони лаёқатманду босавод имтиёзҳои гуногун роҳандозӣ карда шуда, яке аз ин иқдомҳо таъсиси стипендияҳои Президентӣ барои донишҷӯён ва хонандагони муассисаҳои таҳсилоти миёнаи умумӣ, ибтидоӣ ва миёнаи касбӣ мебошад, ки имрӯз теъдоди онҳо 3000 ададро ташкил медиҳад.        Дар идомаи ҳамоиш аз ҷониби  раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳмонзода Абдулло ва раиси шаҳри Истаравшан Адҳам Маъмурзода дар фазои тантанавӣ ба гирандагони стипендияи Президентӣ дар соли таҳсили 2021-2022 шаҳодатномаҳо ва маблағи стипендия супорида шуд.
Дар қисмати фарҳангии чорабинӣ аз ҷониби бахши фарҳанги мақомоти иҷроияи ҳокимияти давлатии шаҳр барномаи пурмӯҳтавои идона ва рангини ҳунарӣ ки саршор аз васфи диёри азизамон – Тоҷикистони соҳибистиқлол, сулҳу ваҳдат, меҳру муҳаббат ва ҳамгироӣ буд, пешкаши ҳозирин гардонида шуда, ба ҳамоиши гирандагони стипендияи Президентӣ ҳусну таровати тоза зам намуд.
Ҳамзамон, дар фарҷоми ҳамоиш гирандагони стипендияи Президентӣ дар шаҳр бо шукргузорӣ аз сулҳу ваҳдати миллӣ, оромиву осудагии кишвар миннатдории самимонаи хешро ҷиҳати дастгирии ҳамаҷонибаи ҷавонон ба Президенти Ҷумҳурии Тоҷикистон муҳтарам Эмомалӣ Раҳмон баён дошта, таъкид намуданд, ки ҳамеша бо ҷонибдорӣ аз сиёсати пешгирифтаи Ҳукумати Ҷумҳурии Тоҷикистон пайравони асили Пешвои муаззами миллат хоҳанд буд ва дар рушду нумӯи кишвар саҳми арзандаи худро хоҳанд гузошт.Аксҳо аз рафти чорабинӣ: